አዲሱ የኤች አይ ቪ ክትባት ሙከራ በደቡብ አፍሪካ ተጀመረ

አዲስ አበባ፣ ህዳር 22፣ 2009 (ኤፍ.ቢ.ሲ) በአለማችን የኤች አይ ቪ ስርጭትን በተመለከተ ግብዛቤ ለመፍጠር የፈረንጆቹ ታህሳስ 1 ቀን የአለም ኤድስ ቀን ተብሎ ታስቦ ይውላል።

በዚሁ እለት የኤች አይ ቪ ምርመራን የሚያበረታቱ እና ስለ በሽታው መንስኤ እና መተላለፊያ መንገዶች የሚያስረዱ ፅሁፎች ይበተናሉ፤ የግንዛቤ ማስጨበጫ ፕሮግራሞችም ይከናወናሉ።

ኤድስ እስካሁን 35 ሚሊየን የአለማችን ህዝብ ለህልፈት ዳርጓል። በየአመቱም 2 ሚሊየን ሰዎች በቫይረሱ ይያዛሉ።

የተባበሩት መንግስታት ድርጅት መረጃ እንደሚያሳየው በየአመቱ ከ1 ሚሊየን በላይ ሰዎች በቫይረሱ ምክንያት ህይወታቸው ያልፋል።

የአለም ኤድስ ቀን መከበር ከጀመረበት እንደ አውሮፓውያኑ አቆጣጠር ከ1988 ጀምሮ የተለያዩ ተግባራት ተከናውነዋል።

በቫይረሱ መያዝ እንደ ርግማን ከሚቆጠርባቸው ሀገራት ጀምሮ የሰለጠኑት ሀገራት የቫይረሱን ስርጭት ለመቀነስ ከፍተኛ ስራ ሰርተዋል።

የኤች አይ ቪ ቫይረስ በደማቸው ውስጥ የሚገኝባቸው እናቶች ጤናማ ልጅ መውለድ እንዲችሉ መደረጉ ለዚህ አንዱ ማሳያ ነው።

የቫይረሱን ስርጭት ለመግታት የሚያስችሉ መድሃኒቶች ጥቅም ላይ መዋልም የበርካቶችን ህይወት ታድጓል።

በአለማችን እስካሁን ከ18 ሚሊየን በላይ ሰዎች የፀረ ኤች አይ ቪ መድሃኒቶችን በመውሰድ ላይ መሆናቸውን ነው መረጃዎች የሚያሳዩት።

በአሁኑ ወቅትም ተመራማሪዎች ለበሽታው አዲስ ክትባት እየሰሩ መሆኑ ተነግሯል።

አዲሱ የኤች አይ ቪ ክትባትም በደቡብ አፍሪካ ከትናንት ጀምሮ ሙከራ እየተደረገበት ነው።

ከ2009 ወዲህ ሰፊ ጥናት የተደረገበት አዲሱ የኤች አይ ቪ ክትባት በ5 ሺህ 400 ለወሲብ ቅርብ የሆኑ ወጣቶች ላይ ይሞከራል ተብሏል።

የክትባቱ ውጤታማነት ጥናት የሚደረግባት ደቡብ አፍሪካ ከ7 ሚሊየን በላይ ዜጎቿ የኤች አይ ቪ/ኤድስ ተጠቂ ናቸው።

የኤች አይ ቪ ቫይረስ በፈረንጆቹ 1983 መታየት ከጀመረ ወዲህ እስካሁን ውጤታማ ክትባት ለማግኘት የተደረገው ጥረት አልተሳካም።

እንደ አውሮፓውያኑ በ2009 በታይላንድ የተሞከረው አዲሱ የኤች አይ ቪ ክትባት በደቡብ አፍሪካም የሚኖረው ውጤት ከአራት አመት በኋላ ይታወቃል ተብሏል።

 

ምንጭ፦ http://cctv-africa.com/


በፋሲካው ታደሰ